काठमाडौं । सर्वोच्च अदालतका न्यायाधीश हरिकृष्ण कार्कीले संसद विघटनको सुनुवाई गरिरहको संवैधानिक इजलासमा नबस्ने घोषणा गरेका छन् ।
संसद विघटनविरुद्ध परेका रिटहरुको सुनुवाईका लागि प्रधानन्यायाधीश चोलेन्द्रशम्शेर जबराले आज पनि यसअघिकै स्वरूपमा संवैधानिक इजलास गठन गरेका थिए । जहाँ उनले आफ्नो नेतृत्वको संवैधानिक इजलासमा न्यायाधीश कार्कीसहित विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी तोकेका थिए ।
विपक्षीहरुको जवाफ आएसँगै आज (बुधबार)बाट सुरु भएको सुनुवाईका क्रममा बरिष्ठ अधिवक्ता शम्भू थापा र दीनेश त्रिपाठीले न्यायाधीश कार्कीको सहभागीतालाई लिएर प्रश्न उठाएका थिए ।
उनीहरुले न्यायाधीश कार्की प्रधानमन्त्री ओली नेतृत्वको अघिल्लो सरकारमा महान्यायाधिवक्ता रहेकाले अहिले यस मुद्दा हेर्दा स्वार्थ बाझिने तर्क गरेका थिए ।
यसैबीच सर्वोच्चले मुद्दाको सुनुवाई संवैधानिक इजलासबाटै हुने र कार्कीको ठाउँमा अर्का न्यायाधीशलाई राख्ने जनाएको छ ।
