काठमाडाैं । अख्तियार दुरुपयोग अनुसन्धान आयोगले घुस लिएकाे आरोपमा नायब सुब्बासहित २ जनालाई पक्राउ गरेकाे छ ।
पक्राउ पर्नेमा मालपोत कार्यालय हरिवन, सर्लाहीका नायव सुब्बा बेदनिधी बराल र लेखापढी व्यवसायी राम सुन्दर महतो रहेका अख्तियारले जनाएकाे छ।
मालपोत कार्यालय हरिवनमा कार्यरत नायव सुब्बा बराल र हरिवन नगरपालिका-२ सर्लाहीका लेखापढी व्यवसायी राम सुन्दर महतोले जग्गाधनी दर्ता प्रमाण पत्र (लालपुर्जा) मा नाम संशोधन गरे वापत सेवाग्राहीसँग अतिरिक्त रकम माग गरेकाे सूचनाकाे आधारमा आयोगको कार्यालय बर्दिवासबाट खटिएकाे टाेलीले नियन्त्रणमा लिएकाे हाे ।
लेखापढी व्यवसायी महतोलाई सेवाग्राहीबाट एघार हजार रूपैयाँ लिइसकेको अवस्थामा उक्त रकमसहित नियन्त्रणमा लिइएको साथै नायब सुब्बा बराललाई कार्यालयबाटै नियन्त्रणमा लिइएकाे अख्तियार दुरुपयोग अनुसन्धान आयोगका प्रवक्ता तारानाथ अधिकारीले जानकारी दिए ।
