काठमाडाैं । प्रधानमन्त्री केपी शर्मा ओली शुक्रबार धनगढी जाँदै हुनुहुन्छ । पार्टी विभाजनपछि नेकपाको ओली समूहले धनगढीमा आयोजना गर्ने जनसभालाई सम्बोधन गर्न प्रधानमन्त्री ओली धनगढी जान लाग्नुभएकाे हाे ।
प्रधानमन्त्री ओली प्रतिनिधिसभा विघटनपछि पहिलोपटक पत्यकाबाहिरको कार्यक्रममा सहभागी हुन लाग्नुभएकाे हाे । प्रधानमन्त्रीको सुरक्षालाई मध्यनजर राखी धनगढीमा सुरक्षा सतर्कता बढाइएको छ । प्रधानमन्त्री ओलीको भ्रमणलाई मध्यनजर गर्दै सुरक्षा व्यवस्था कडा पारिएको सुदूरपश्चिम प्रदेश प्रहरी कार्यालय, दिपायलले जानकारी दिएको छ ।
सुरक्षाका चार वटै अंग परिचालित गरिएको छ । प्रमुख जिल्ला अधिकारी यज्ञराज बोहराले कार्यक्रमस्थल, भेटघाट स्थल आवागमन मार्गलगायत सवैतिर सुरक्षा तयारी बढाइएको जानकारी दिनुभयाे ।
नेकपा ओली समूहका प्रदेश अध्यक्ष कर्णबहादुर थापाले सभाको तयारी पूरा भएको जानकारी दिनुभयाे । जनसभाका लागि विभिन्न समिति गठन गरिएको उहाँले जानकारी दिनुभयाे । धनगढीमा हुने जनसभामा ५० हजार जनता उतार्ने नेकपा सुदूरपश्चिम ओली समूहको तयारी छ ।
उद्योग वाणिज्य तथा आपूर्तिमन्त्री लेखराज भट्ट, श्रम रोजगार तथा सामाजिक सुरक्षामन्त्री गौरीशंकर चौधरी, वन तथा वातावरणमन्त्री प्रेम आले र संघीय मामिला तथा सामान्य प्रशासन मन्त्री गणेशसिंह ठगुन्ना भने चारदेखि धनगढीमै छन् ।
प्रधानमन्त्री ओलीले गत पुस ५ गते प्रतिनिधि सभा भंग गरेपछि नेकपाभित्र विवाद चुलिएको छ । जसको असर पार्टीभित्र परेको छ र दुई भिन्न समूह क्रियाशील छन् । संसद विघटनपछि विभाजित नेकपाका दुवै समूहले आ-आफ्ना कार्यक्रमलाई तीव्रता दिएका छन् ।
पार्टी विभाजनपछि सुदूरपश्चिममा ओली समूह कमजोर छ । नेकपाका ३९ जना सांसद मध्ये ओली समूहमा मात्रै ७ जना छन् । तर ओलीले सुदूरपश्चिममा आफ्नो पकड जमाउन प्रतिनिधिसभा विघटनपछि विस्तार गरिएको मन्त्रीमण्डलमा सुदूरपश्चिमबाट मात्रै तीनजनालाई संघीय सरकारको मन्त्री बनाउनुभएकाे छ ।
‘दाहाल-नेपाल’ समूहले प्रतिनिधिसभा विघटनको विरोधमा प्रदर्शन गर्दै आएको छ भने ओली समूहले निर्वाचनको तयारीमा जुट्न आग्रह गर्दै कार्यकर्ता भेला तथा प्रशिक्षणलाई निरन्तरता दिँदै आएको छ ।
