काठमाडौं । प्रहरीमा सरुवा र बढुवाको रन्को शुरु भएको छ । जिल्ला प्रमुखका रुपमा केही एसपीहरुको एक बर्षे अवधि पुगेकाले यसै साता सरुवा गर्ने तयारीमा प्रहरी मुख्यालय पुगेको छ भने एसएसपी र एसपीको बढुवा तयारी पनि भईरहेको छ । त्यसैले बढुवाका आकांक्षीहरु विभिन्न शक्तिकेन्द्रको फेरो लगाउने क्रम पनि तीव्र रुपमा चलेको छ ।
गत पुस १३ मा गृह मन्त्रालयले ९ जना प्रहरी वरिष्ठ उपरीक्षक (एसएसपी) लाई प्रहरी नायव महानिरीक्षक (डीआईजी) मा बढुवा सिफारिस गरेको थियो । एक सातासम्म कुनै उजुरी नपरेपछि डीआईजी बढुवा आजबाट पूर्ण भएको छ ।
डीआईजीको अन्तिम सूची प्रकाशन गरेपछि तत्काल योग्यता पुगेका प्रहरी उपरीक्षकहरुलाई एसएसपीमा बढुवा सिफारिस गर्ने तयारी प्रहरी मुख्यालयको छ । तर आगामी पुष २९ गते दुईजना एसएसपीले ३० बर्षे सेवाहदका कारण अनिवार्य अवकाश पाएपछि मात्र बढुवा प्रक्रिया शुरु गर्ने जानकारी मुख्यालय स्रोतले दिएको छ । त्यसपछि ११ एसएसपी पद रिक्त हुनेछ ।
प्रहरी मुख्यालयका अनुसार डा. गणेश रेग्मी र राजकुमार बैदवार ३० वर्षे सेवाहदका कारण अवकाशमा जान लागेका हुन् । उनीहरु ०४७ माघमा प्रहरी सेवामा प्रवेश गरेका थिए ।
त्यस्तै डीएसपीबाट एसपीमा बढुवा हुनेहरुको पनि ताँती लागेको छ । १५ जना एसपीको पद खाली हुनेछ । जसमा ११ जना पुरानो टोलीका प्रतिस्पर्धीहरु लाइनमा उभिएका छन् ।
प्रतिस्पर्धामा को–को ?
एसएसपी बढुवाका आकांक्षीहरुमा पुरानो ब्याचका १३ जना प्रहरी उपरीक्षकहरु प्रतिस्पर्धामा छन् । ०५१ मा प्रहरीमा सेवा प्रवेश गरेका विकासराज खनाल, चक्रबहादुर सिंह, उमाशंकर पञ्जियार,टीका बहादुर केसी, कृष्णकुमार महत, अर्जुनचन्द ठकुरी,योगबहादुर पाल, कृष्णहरी शर्मा पोखरेल, मधुसुदन लुईटेल, सुरेन्द्र मैनाली, गोविन्द शाह, मोहन पोखरेल र ध्रुवराज राउत एसएसपी लाइनमा छन् ।
०५४ मा सेवा प्रवेश गरेका प्रहरी अधिकृतले पनि बढुवाको आकांक्षा राखेका छन् । यद्यपि उनीहरुलाई बढुवा नगर्ने आईजीपी शैलेश थापा क्षेत्रीले अडान लिएका छन् । बिगतमा पनि थापाले वरिष्ठता मिचेर बढुवा नदिने अडान लिँदै आएपनि पूर्णसफल हुन सकेका छैनन् ।
